சிறைச்சாலைகளில் கமரா பொருத்துவதற்கு நடவடிக்கை: அமைச்சர் சுவாமிநாதன்

சிறைச்சாலைகளில் கமரா வசதிகள் இல்லை. இதனால் இரண்டு மாதத்திற்குள் அனைத்து சிறைச்சாலைகளுக்கும் கமரா பொருத்தவுள்ளதாகவும், முதலில் வெலிக்கடை சிறைச்சாலைக்கும் அதன் வைத்தியசாலைக்கும் கமரா பொருத்துவதற்கு தீர்மானித்துள்ளதாக சிறைச்சாலை மறுசீரமைப்பு, புனர்வாழ்வு மற்றும் இந்து மத விவகார அமைச்சர் டி.எம். சுவாமிநாதன் தெரிவித்துள்ளார்.

அத்துடன் கைதி ஒருவர் ஒரு வைத்தியசாலையில்யில் அனுமதிக்க வேண்டுமாயின் நான்கு வைத்தியரின் சான்றிதழ் பெற வேண்டும் என்பதனை கட்டாயம் செய்யவுள்ளோம் என்றும் அவர் குறிப்பிட்டார். சிறைச்சாலை மறுசீரமைப்பு, புனர்வாழ்வு மற்றும் இந்து மத விவகார அமைச்சில் நடைபெற்ற ஊடகவியலாளர் மாநாட்டில் கலந்து கொண்டு உரையாற்றுகையிலேயே அவர் மேற்கண்டவாறு தெரிவித்தார்.

அவர் மேலும் குறிப்பிடுகையில்,

தற்போது சிறைக்கு செல்லும் அனைவரும் வைத்தியசாலைக்கு செல்வது வழக்கமாகி விட்டது. இதற்கு முற்றுப்புள்ளி வைக்கும் முகமாக கைதியொருவரை வைத்தியசாலையில் அனுமதிக்க வேண்டுமாயின் நான்கு வைத்தியர்களின் சான்றிதழ் பெற வேண்டும்.

தற்போது உலகில் உள்ள சிறைச்சாலைகளின் தரத்தின் அடிப்படையில் பார்க்கும் போது இலங்கை சிறைச்சாலை தரமிக்கதாக உள்ளது. தற்போது இங்கு பாரியளவில் பிரச்சினைகள் கிடையாது. அத்துடன் வெலிக்கடை சிறைச்சாலையை ஹொரணைக்கு மாற்றுவதற்கான பணிகளை நாம் ஆரம்பித்துள்ளோம் எனவும் அவர் மேலும் தெரிவித்துள்ளார்.